Plantun de Prouvènço

Pèr coumpara dos planto d'encò nostre

Ononis pusilla & Cyperus esculentus

Ononis pusilla

Fabaceae Leguminosae

Noms en français : Bugrane naine, Bugrane fluette.

Descripcioun :
L'esbroutouiro-naneto es uno pichoto planto, souvènt aubourado, que trachis dins li relarg secarous. Li flour, jauno, soun en grapo sarrado. Se destrìo de si cousino bonodi si fueio bratealo, de cop, emé un soulet fueioun. Li dòusso, negro un cop maduro, fan de 4 à 10 mm e caupon de 3 à 5 grano berugouso.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 30 cm
Fueio : coumpausado
Tipe bioulougico : Camefite
Cicle bioulougico : Planto renadivo

Gènre : Ononis
Famiho : Fabaceae
Famiho classico : Leguminosae

Ordre : Fabales

Coulour de la flour : Jauno
Petalo : irreguliero
Ø (o loungour) flour : 0,5 à 1,2 cm
Flourido : Printèms - Estiéu

Sòu : Ca
Autour basso e auto : 0 à 1700 m
Aparado : Noun
Jun à setèmbre

Liò : Pelouso - Relarg à jóuinis aubret - Tepiero seco
Estànci : Subremediterran à Mountagnard
Couroulougi : Eurimediterrano
Ref. sc. : Ononis pusilla L., 1759

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.